Iqaluini Nunavummiittumi (Canada) Alianait Arts Festivalip juunip 29-anit juulip aappaata tungaanut ingerlanneqarnerani Nuummi Eqqumiitsulianik Saqqummersitsivik aamma Iqaluiniittoq Nunatta Sunakkutaangit Museum paarlaasseqatigaa.

Festivaleqarnerani Shuvinai Ashoonap (in. 1961) titartagaa malillugu ikaartitigaq “Standing Rocks” Nuummi Eqqumiitsulianik Saqqummersitsivimmi takusarneqarsinnaavoq. Shuvinai Ashoona kinguaariinni naqiterinermik sannavimmi Cape Dorsetimi, Nunavummi Kinngaitimiittumi, pingajuuvoq. Eqqumiitsuliai ilumoorsaartarput (naturalisme), takorluukkaneertarlutik aammalu quniitsuusarlutik. Eqqumiitsuliai amiilaarnartortaqarsinnaasarput imaluunniit aarlerinartoqarpasittarlutik.

Nuummi Eqqumiitsulianik Saqqummersitsivimminngaanniit Ivínguak’ Stork Høeghip eqqumiitsuliaa erfalasoq “Zebratiga” 2020-meersoq Nunatta Sunakkkutaangit Museumimi festivaleqarnerani takuneqarsinnaavoq, aammalu Stork Høeghip naqitertigai pingasut tunniunneqarlutik.