Ammaqqinnissaq martsip 21-at nal. 13-17
Kinguaattooqqareerluta allanngortiterinermillu ulappute-qareerluta tallimanngornermi martsip 21-ani nal. 13-17 ammaqqissaagut. Kaffi/tii/safti kaagillu sassaalliutaas-sapput, isernerlu akeqassanngilaq. Allanngortiterinermi suliarisimasagut alakkarsigit. Takunissassinnut qilanaarpugut! Allanngortiterineq ilaatigut Bikubenfon-denimit Nordisk Kulturfondimillu aningaasalerneqarpoq. Taakku qutsavigaagut!

Juullimi inuulluaqqussut matugallarnerlu

Maajimi saqqummersitsiviup ukiunik 20-nngortorsiornissaanut atatillugu eqqarsaatersuutit amerlaqaat. Taamaammallu ukioq nutaaq nutarterilluta aallartissavarput: Saqqummersitsivik januaarimi februaarimilu matoqqassaaq, martsimi ammaanersioqqissalluta.

Ullorsiutit 2025
Ukioq manna 2025-mut eqqumiitsulianik imalimmik ullorsiutinik naqiterititsivugut, saqqummersitsineq ”Illoqarfik” tunngavigalugu. Grafisk Værkstedimit, ullumikkut Eqqumiitsuliornermik Ilinniarfik, 1970-ikkunni ullorsiutit isumassarsiorfigalugit ullorsiutiliorpugut. Ullorsiutit saqqummersitsivimmi pisiassaapput, 250,- kr.

Saqqummersitsineq: Melting Barricades
Sisamanngornermi oktobarip qulingani Nuummi Eqqumiitsulianik Saqqummersitsivimmi saqqummersitsineq nutaaq ammaanersiorneqassaaq. Saqqummersitsinerup qulequtaraa ”Melting Barricades” Inuk Silis Høeghimit aamma Asmund Havsteen-Mikkelsenimit suliarineqarsimasoq, 2024-milu ukiunik 20-nngortorsiorluni.

Eqqumiitsuliorluni suliaq immikkut malunnaatilik Augustinus Fonden-imit tapiissutinik qulakkeerneqarpoq
Aningaasaliissuterpassuit Augustinus Fonden-imeersut pissutaallutik Melting Barricades, Asmund Havsteen-Mikkelsen-imit Inuk Silis Høegh-millu pilersinneqarsimasoq, Nuummi Eqqumiitsulianik Saqqummersitsiviup ataatsimut pisiarisinnaalerpaa.