KIMIK: Tulukkat uumasullu allat silassorissut 02.04.-30.05. 2021

Eqqumiitsuliat saqqummersinneqartut atortutigut sammineqartutigullu siammasittarneri KIMIKip saqqummersitsisarnerisa ilisarnaatigaat. Qulequtaq ”Tulukkat uumasullu allat silassorissut” tunngavigalugu eqqumiitsuliortut saqqummersitsipput. Qulequtaa Arnannguaq Høeghimut, KIMIKimullu ilaasortaasimagaluanut allanut, eqqaaniutaavoq. Saqqummersitsineq ukiumi 2021-mi Kalaallit Nunaanni eqqumiitsuliornerup qanoq isikkoqarneranik takutitsisuuvoq, saqqummersitallu amerlanerit pisiarineqarsinnaassallutik.

Eqqumiitsuliortut uku saqqummersitseqataassapput: Ivínguak’ Stork Høegh, Kristine Spore Kreutzmann, Lisa Kreutzmann, Miki Jacobsen, Elvar Örn Kjartansson, Naja Rosing-Asvid, Ivalo Abelsen, Julie Pars, Lisbeth Karline Poulsen, Paarma Brandt, Buuti Pedersen, aamma Maria Panínguak’ Kjærulff.

Sisamanngornermi apriilip aallaqqaataani nal. 15 ammaanersiussaaq, saqqummersitsinerlu 2021-mi maajip 30-ata tungaanut takusarneqarsinnaavoq.

Saqqummersitsineq Namminersorlutik Oqartussanit Tips- og Lottomidlerne aqqutigalugu aningaasaliiffigineqarpoq.

KIMIK pillugu

KIMIK tassaavoq Nunatsinni Eqqumiitsuliortut Peqatigiiffiat, 20-llu sinnilaarlugit ilaasortaqarluni. Peqatigiiffik 1995-imi pilersinneqarpoq namminerlu Nuummi Nuutoqqami sannaveqarluni.

Ilaasortanngorniaraanni qinnuteqarfiup nalaani Kalaallit Nunaanni najugaqartariaqarpoq, aammalu eqqumiitsuliornermik ingerlariaqqiffiusumik ilinniagaqarsimaneq imaluunniit qaffasissumik eqqumiitsuliornermik piginnaasaqarneq uppernarsarsinnaassalluni.

KIMIK nittartagaani paasissutissanik allanik pisinnaavutit: www.kimikart.com