Saqqummersitsineq: Melting Barricades

Suliarinnittut: Inuk Silis Høegh & Asmund Havsteen-Mikkelsen

Sisamanngornermi oktobarip qulingani Nuummi Eqqumiitsulianik Saqqummersitsivimmi saqqummersitsineq nutaaq ammaanersiorneqassaaq. Saqqummersitsinerup qulequtaraa ”Melting Barricades” Inuk Silis Høeghimit aamma Asmund Havsteen-Mikkelsenimit suliarineqarsimasoq, 2024-milu ukiunik 20-nngortorsiorluni.

Taamani Kalaallit Nunaata sakkutooqarfianut allatsinnissamut periarfissaasimasoq eqqaamaviuk? Taamani kalaallit erfalasuata ataani sakkutuut Nuummi ingerlaarmata eqqaamavigit? Sakkutuutut atisaqarlutik, sakkutuutut biileqarlutik, megafonilerlutik, sakkutuutullu tupeqarlutik, Inuk Silis Høegh aamma Asmund Havsteen-Mikkelsen 2004-mi Kalaallit Nunaata sakkutooqarfiata pilersinneqarnera suaarutigivaat. Allatsittut uuttortissinnarlutik qimussernermik, umiatsiarnermik qamuteralannermillu pisinnaasaat pillugit apersorneqarput, aammalu puisimik, tuttumik nanumilluunniit pisaqarnikuunersut apersorneqarput.

Eqqumiitsuliorluni suliaq ”Melting Barricades”-imik qulequtserneqarpoq – eqqumiitsuliorluni suliniut uissuumminartoq, Kalaallit Nunaanni taama suliani siullersaat. Suliniutip sorsuttarneq nunasiaateqartarnerlu immikkut sammivai, quiasaarineq mitakujunnerlu aqqutigalugit nunasiaateqartarnerup kinguneri isornartorsiorpai.

Augustinusfondenimit tapiineq tukkusooq aqqutigalugu Nuummi Eqqumiitsulianik Saqqummersitsiviup 2024-mi ”Melting Barricades”-imit katersat tamaasa pisiarisinnaalerpai. Pisiarinerisa eqqumiitsuliorluni suliniut kingorna piumasunut tamanut saqqummersitsiviup takutissinnaalerpaa, Kalaallit Nunaatalu eqqumiitsuliornikkut oqaluttuarisaanerata ilaanik siunissami piujuaannartitsisinnaanissaq qulakkeerlugu.

”Melting Barricades aqqutigalugu sakkutooqarneq, namminersortuuneq, Danmarkimit nunasiaataasimaneq, kalaallinillu pingaartitat pillugit oqallititsineq eqqarsaatersuuteqarnerlu pilersinneqarput, aammalu piviusuusinnaasumik allamik takutitsilluni. Suliniut Kalaallit Nunaanni eqqumiitsuliornermi pingaarnerpaat ilagaat, taamaammallu ataqqinningaartumik tulluusimaarnartumillu maanna Nuummi Eqqumiitsulianik Saqqummersitsivimmi katersat ilagilissavaat. Eqqumiitsuliortut suleqatiginerannut Augustinus Fondenimillu tapiissutinut qujanarujussuaq.” – Saqqummersitsivimmi aqutsisoq Nivi Christensen

Videoliat, plakaatit, passit, erfalasut, paasisitsiniaanermi meqqit nipitittakkat, annanniarnermut najoqqutassaq, assit, aviisini allaaserisat, tupeq, uniformit, titartaqqaakkallu ilaatigut katersanut ilaapput, saqqummresitsinermilu takuneqarsinnaassallutik.
Saqqummersitsineq sisamanngornermi oktobarip qulingani nal. 17 ammaanersiorneqassaaq, decembarillu 30-ata tungaanut Nuummi Eqqumiitsulianik Saqqummersitsivimmut takusarneqarsinnaassalluni. Saqqummersitsineq Augustinusfondenimit taperneqarpoq.