Holmip Illua Nuummi namminersuutigalugu illuliat siullersaraat. Ullumikkut aserfallassimalluni ippoq, illulu pillugu isummersuutit oqaatigiumasallu arlaqaqaat.

Nuummi Eqqumiitsulianik Saqqummersitsiviup eqqumiitsuliortut marluk kajumissaarsimavai Holmip Illua 2019-ip aasaani saqqummersitsivittut atoqqullugu, illup oqaluttuassartaa ataqqiniarlugu illoqarfiullu qeqqani inissisimanera atorluarumallugu.

Bolatta Silis-Høegh (in. 1981) eqqumiitsuliortuni saqqummersitsisuni siulliussaaq. Saqqummersitassai naasoq ukaliusaq, maannakkorpiaq tamani tamaani takussaaleruttortoq, aallaavigalugu ilusilersugaassapput. Ukaliusap oqissusia aasallu qilaata tungujornera ilusilersukkami qitiussapput. Saqqummersitsineq ammarneqassaaq sisamanngornermi 18. juuli nal. 16. Saqqummersitsinerlu takuniarneqarsinnaassaaq Holmip Illuanut tallimanngornermiit 19. juuli sapaat 21. juuli ilanngullugu, aamma 26., 27., 28. juuli piffissami 14-17. Kikkulluunniit tikilluaqquneqarput.

Eqqumiitsuliortoq Bolatta Silis-Høegh 2015-imissaaq Nuummi Eqqumiitsulianik Saqqummersitsivimmi suliani takutippai qulequtserlugit ”Lights On Lights Off”. Maannakkullu suliaminik Nuummi saqqummersitseqqilerpoq.

Saqqummersitsinermut aningaasaliisuuvoq Tapiissuteqarfik Sermeq.