Saqqummersitsineq: FACES// Kiinnernerit
Ivalo Frankip aamma Jessie Kleemannip kiinnat isikkui aamma politikkikkut ajornartorsiutit Nuuk Kunstmuseumimi saqqummersitsinermi angisuumi nutaami pingaarnertut sammivaat. Eqqumiitsuliortut aqqut aaliangersimasoq ingerlaarfiginngilaat, karsinut immikkoortitaakkanut naammagutinngillat, pituttorneqarsinnaanatillu. Saqqummersitsineq pilersinneqareersimallunilu suli suliarineqarpoq, uagullu peqataatinneqarluta.
FACES// Kiinnernerit taallianik, assitigut oqaasertaliussanik, takutitsinernik aamma politikkimik ataqatigiilersitsinertut suliaavoq. Saqqummersitsinermi Ivalo Frankip titartagai qalipagaalu nutaat Jessie Kleemannip taalliaanik akullugit takutinneqarput. Assilissat kiinnat isikkuinik assigiinngitsunik arlalinnik, isummakkut qanoq issutsimik takutitsisunik assiliartaqarput, Kleemannillu oqaatsit atorlugit inuiaqatigiittut nalitsinni unammilligassatsinnik isummersorneranik akoorneqarlutik. Oqaatsit atorneqartut takuneqarsinnaasunik tarrarsortinnissaat, aamma oqaatigineqartut oqaatigineqanngitsunik ersersitsinissaat isumaavoq. Inoqatitsinnik paasinnittarnitta ilarujussua misiginngisatsinnik pisarpoq, saqqummersitsinerlu misigisimasanngisatsinnik misissuineruvoq. Amerlasuutigut malunnanngitsumik isit takutitaat, qarnup equtinneri, eqinganerit sammivii. Taamaattumik oqaatsit, oqaasertaliussat, assitigut oqaasertaliussat aamma takutitsineq assigiimmik annertoqatigiiaamik atorlugit eqqumiitsuliortut suliaqarput – sapinngisaq tamakkerlugu saqqummersitamik takuniaasoq toqqaannartumik sunnerniarlugu.
Jessie Kleemanni aamma Ivalo Franki 2010-mi Nuummi naapipput, saqqummersitsinermut ‘KUUK’-mut atatillugu inissiami ineqatigiikkamik. Naapinnermi tassani ataatsimoorlutik siunissami suliniutissaminnik eqqartueqatigiipput, tamanna ilaatigut filmilianik RECONCILIATIONimik aamma Killerbirdimik kinguneqarluni (Katuami 2015-imi saqqummersinneqartut). Suliat taakku marluk taallat (Jessie Kleemannimit) aamma assiliartalersuutit (Ivalo Frankimit) akuleriissillugit suliarineqarneri nutaaliorluni suliaapput. Inuit nalinginnaasut atukkamikkut tunngaviusumik atugarisaat filmini ersersinneqarput – siornatigut pisimasut akuerinissaannut akiuunneq akuersinerlu, taamaaliornikkullu imminut akuerineq – taallat, timi aamma nipi atorlugit. Eqqumiitsuliortutut suleqatigiit taakku 2016-imi – Gyldendalip litteraturtidsskriftianit Kritikimit – assilissanik taallanillu In your facemik taaguutilimmik saqqummersitsinissaminnut peqatiserineqarput. Taanna saqqummersitsinissamut FACES// Kiinernerit’mut, Nuuk Kunstmuseumimi sisamanngorpat nal. 19 ammarneqartussamut, aallarniutaavoq.
Ammaanermi Jessie Kleemanni taallianik saqqummiussissaaq. Saqqummiussineq filmiliarineqassaaq, kingornalu katersugaasivimmi takutitassiarineqassalluni.
// Saqqummersitsinermut ”FACES – Kiinnernerit” atuartitsissutissat
Saqqummersitsinermut, qulequtalerneqarsimasumut ”FACES – Kiinnernerit”, meeqqat atuarfiini 5. klassemiit qummut atuartitsissutissanik pilersitsinikuuvugut, kalaallisut qallunaatullu pineqarsinnaasut.
Atuartitsissutissat misigissutsinik ersersitsinermut eqqarsaatersuuteqarnermullu tunngapput, aammattaaq kiinnernernut ussersornernullu tunngallutik. Taalliat ilusillit aamma pisuusaartitsinerit atorlugit eqqumiitsuliat saqqummersitsivimmiittut sammineqarsinnaallutik.
Atuartitsissutit ugguuna aakkit: