Hans Egede sukkut tamatigut nuisarpoq. Københavnimi Frederiks Kirkep (Marmorkirken) silataani inuusaliatut, Norgemi sumiiffinni assigiinngitsuni, Aalut Kangermiup eqqumiitsuliaani, sikutut aammalu Nuummi illoqarfimmi sumi tamaani graffititut.

Uani saqqummersitsinermi assitaliornerit amerlanerit Hans Egedep Kalaallit Nunaata sineriaanik takoqqaarneranik imaluunniit kalaallinik naapitseqqaarneranik takutitsisarput. Aalut Kangermiup eqqumiitsuliamini Hans Egedep biibili kristumiuussuserlu atorlugit sulinera takutippaa, Paarma Brandtili Kunuk Platoulu ajoqersuisumik Hans Egedemik isornartorsiuineq tunngavigalugu suliaqarsimallutik.

Inuusaliaq Nuummiittoq Hans Egedemik assitaliornerni ilisimaneqarnerpaajugunarpoq, assullu sammineqartaqaluni. Inuusaliaq siullerpaamik 1977-imi qalipaammik kuineqarpoq, Hans Egedep Oqaluffiata silataani Jonathan Petersenimut eqqaassutissaq taamani aamma qalipaaserneqarsimalluni. Taamaniilli inuusaliaq arlaleriarluni qalipaammik kuineqarlunilu allaffigineqartarsimavoq. 2012-imi aappaluttunik sanningasulersorneqarsimavoq aammalu 666 allanneqarsimalluni. 2015-imi guldtimik qalipaammik kuineqarsimavoq. Juunip 21-ani 2020-mi, Inuiattut Ullorsiornissap unnuaani, kingulliugallartumik qalipaammik aappaluttumik kuineqarpoq, qaqortumik kakiornernik titartaaffigineqarluni aappaluttumillu ”DECOLONIZE” allanneqarsimalluni.

Saqqummersitsinermi uani assitaliornerpassuit assigiinngitsut takutinneqarput. Eqqumiitsuliat, umiarsualiaq, graffiti, aviisit assitaat, frimærkit aamma ullorsiornermut atatillugu puugutaliaq.