Ukioq manna KIMIK Nuummi Eqqumiitsulianik Saqqummersitsivimmi saqqummersitsissaaq. Februaarip 16-iani nal. 17 ammaanersiorneq pissaaq. Saqqummersitsinerup qulequtaraa ”Ukioq / Vinter”.

Saqqummersitsinermi eqqumiitsuliortut uku peqataassapput: Lisbeth Karline, Ivínguak’ Stork Høegh, Buuti Pedersen, Kristine Spore Kreutzmann, Maria Panínguak Kjærulff, Mike Lynge, Naja Rosing-Asvid, Miki Jacobsen, Lena Augusta Olsen, Ivalo Abelsen, Elvar Örn Kjartansson, Arnajaraq Støvlbæk, Peter Kristiansen, Lisa Kreutzmann, Julie Edel Hardenberg.

KIMIK-ikkut ukiumoortumik saqqummersitsineranni eqqumiitsuliortut assigiinngitsorpassuit suliaannik takusaqarnissamut periarfissani pitsaanerpaavoq. Eqqumiitsuliat saqqummersinneqartut atortutigut sammineqartutigullu siammasittarneri ukiumoortumik saqqummersitsisarnerit ilisarnaatigaat. Qulequtaq ”Ukioq / Vinter” tunngavigalugu eqqumiitsuliortut ukioq manna saqqummersitsissapput. Saqqummersitsineq ukiumi 2023-mi Kalaallit Nunaanni eqqumiitsuliornerup qanoq isikkoqarneranik takutitsisuuvoq, saqqummersitallu amerlanerit pisiarineqarsinnaassallutik.

Saqqummersitsineq apriilip 30-ata tungaanut takuneqarsinnaassaaq. Namminersornerullutik Oqartussat aqqutigalugit Eqqumiitsuliornermut Aningaasaateqarfimmit taperneqarpoq.

KIMIK pillugu

KIMIK tassaavoq Nunatsinni Eqqumiitsuliortut Peqatigiiffiat, 20-llu sinnilaarlugit ilaasortaqarluni. Peqatigiiffik 1995-imi pilersinneqarpoq namminerlu Nuummi Nuutoqqami sannaveqarluni.

Ilaasortanngorniaraanni qinnuteqarfiup nalaani Kalaallit Nunaanni najugaqartariaqarpoq, aammalu eqqumiitsuliornermik ingerlariaqqiffiusumik ilinniagaqarsimaneq imaluunniit qaffasissumik eqqumiitsuliornermik piginnaasaqarneq uppernarsarsinnaassalluni.