![](http://www.nuukkunstmuseum.com/wp-content/uploads/2024/06/Kunuk-Platou-1-768x1024.jpg)
Eqqumiitsuliortoq: Kunuk Platou.
Inuiattut Ullorsiornitsinni juunip 21-ani nal. 14 saqqummersitsineq ”Illoqarfik” Nuummi Eqqumiitsulianik Saqqummersitsivimmi ammaanersiorneqassaaq. Oqaaseq illoqarfik saqqummersitsinermi illoqarfittut sammineqarpoq, aammali sumiiffik sunaluunniit illumik illunilluunniit takusassartalik sammineqarpoq. Saqqummersitsinermi eqqumiitsuliortut illoqarfik sammillugu eqqumiitsuliaat takuneqarsinnaassapput. 1800-kkunninngaanniilli ullutsinnut naqiterisarnermi, assitalersuisarnermi eqqumiitsuliornermilu illoqarfik sammineqartarsimasoq takusinnaavarput. Grafisk Værksted (naqiteraluni sannavik, ullumikkut Eqqumiitsuliornermik Ilinniarfiusoq) 1972-imili ammarneranit Nuummi Kalaallit Nunaannilu sumiiffinni allarpassuarni blokkit naqitikkani sammineqarsimasut takuneqarsinnaapput. Nunasiffiit, illoqarfiit, Kalaallit Nunaanni eqqumiitsuliornermi sammineqakkajuttuupput. Eqqumiitsuliortut ilaat inuit illoqarfimmi inissaqartinneqarnerat apeqqusersorpaat, ilaasa nutarterineq unammillerpaat, ilaasa illoqarfiup ilamernga ersarissarpaat, ilaasalu illoqarfimmi illut ilusilersorneqarneri misissorlugit.
”Ukiuni kingullerni 250-ini Kalaallit Nunaanni eqqumiitsuliorneq misissornerani illoqarfik assilialiarineqartarsimasoq takusinnaavarput. Maanna Katuami Eqqumiitsuliornermi Ilinniarfimmi naammassisut Katuami saqqummersitsineranni takusinnaavarput, 1970-ikkunni 80-ikkunnilu Grafisk Værkstedimit katersani takusinnaavarputtaaq. Niuertoqarfinnik assilialiornerni takusinnaavarput, Frederik ’Kunngi’ Kristensenip qalipagaani naqitigaanilu takusinnaavarput, assilisanilu illoqarfinni ilusilersukkatullusooq illuliat takusinnaallutigit. Kalaallit Nunaata eqqumiitsuliornikkut oqaluttuarisaanerani eqqumiitsuliat makku sammineqartarsimanngillat, eqqumiitsuliornermilu illoqarfiup sammineqarnera misissorneqarpiarnikuunani. Saqqummersitsineq una aqqutigalugu tamanna allanngortissallugu neriuutigaarput.”
Niuertumit (kolonibestyrer) Jacob A. A. Arøe-mit (1803-1870), Aalut Kangermiumut (1822-1869), Hans Lyngemut (1906-1988), Anne-Birthe Hovemut (1951-2012), Mike Lyngemut (i. 1976) aammalu Ivínguak’ Stork Høeghimut (i. 1982) ullutsinnilu assiliisartunit illut, illorsuit, illoqarfimmilu inuuneq eqqumiitsuliani sammineqartartut takuneqarsinnaavoq. Illoqarfiup kusanartortaa, illunik ilusilersuisarneq, aliannaarsaarnerit, seqernup tarrilernerani illoqarfik sammineqartartoq takuneqarsinnaavoq. Aammali illoqarfiup kusanannginnertaa sammineqarpoq, illoqarfippalaarneq, graffiti, suliffeqarfissuit sanaartorfiillu sammineqarput. Saqqummersitsinermi eqqumiitsuliortut illoqarfimmik assigiinngitsumik assinnguinerat takusinnaavarput, qalipakkanit naqitikkanut allatigullu. Saqqummersitsinermut atatillugu eqqumiitsulianik illoqarfinnut tunngasunik saqqummersitsinermut ilaasinnaasunik siunnersuuteqarnissamik periarfissamik tamanut ammasumik (qallunaatut: censureret open-call) suaarutigineqarpoq. Toqqarneqarsimasut arlaliusut saqqummersitsinermi takuneqarsinnaassapput.
Saqqummersitsineq tallimanngornermi juunip 21-ani nal. 14 ammaanersiorneqassaaq, isernerlu akeqassanngilaq, septembarillu 15-iata tungaanut takusarneqarsinnaassalluni.
Saqqummersitsineq Namminersorlutik Oqartussanit Tips- og Lottomidlerinit taperneqarpoq.