Assinga kalaallisut oqaasiuvoq sananeqaqqitanik, assiliartaanik kisiannili aamma assinganik isumaqartoq. Tassa saqqummersitsinerup uuma aqqa kalaallinit sisamanit nunanillu avannarlerniit sisamanik eqqumiitsulianik assiliisartunik peqataaffiusussaq. Eqqumiitsuliortut ataatsimoorfigisaat tassaavoq tamarmik Kalaallit Nunaata qaqqarsui sikuusut qaarsuusullu kusanartorsuit kisiisa pinnagit allanilli takutitserusunnerat. Qitiullunnarpoq inuuneq, allaanerussutsit aamma takunnikkusunnermut soqutiginninnerujussuaq. Kalaallit inuiaqatigiit pillugit assigiinngitsunik sammiviit assiutaannit filmiliaannillu takusinnaavavut. Suliaminnit aliasunneq sumiginnaaneq, nutaat nutaanngitsullu, ileqqut illoqarfinnilu misigineqarsinnaasut misissorpaat.
Saqqummersitsinermi eqqumiitsuliortut ilisaritinnerat:
Kalaallit eqqumiitsuliortut
Inuuteq Kriegel Aasiaanni 1989-mi Inunngorpoq.. Nuummut nuunneq. Assilianik sulianik arlalinnik saqqummersitsisuni peqataareersimavoq. Ikinngutini Filip Gielda assilianik sulianik Thirteen (13)-mik taaguutilik peqatigalugu Kalaallit Nunaanni inunnik malunnaatilinnik, qernertumik qaqortumillu qalipaatilinnik kiinnanik 2013-mi suliaqarpoq. 2014-mi kalaallit assiliisartut arfinillit akornanni atuakkami ”ISIT TAKUNNITTUT” saqqummersitsisunut peqataavoq. 2016-mi ataatsimut saqqummersitsinermi Jette Bang i Dialog, fotografisk center-mi Københavnimi peqataavoq aamma taanna kingorna Kulturikkut Illorsuarmi Taseralimmi takutinneqartoq. Nuummi eqqumiitsuliortut tusagassiortunngorniarlutik ilinniartuupput.
Inuuteq Storch 1989-mi Sisimiuni Inunngortoq. Københavnimi Fatamorgana-mi assiliisartutut ilinniagaqarpoq. 2017-mi upernaamiit ukiamut Nunarsuarmi tusaamasaq danskeq assiliisartoq Jacob Aue Sobol-mi praktikkerpoq, ilaatigut taassuma assiliisartup atuakkiai assitallit Sabine Tunumi assingi suliarai. 2016-mi ataatsimut saqqummersitsinermi Storch, Jette Bang i Dialog, fotografisk center-mi Københavnimi peqataavoq aamma taanna kingorna Kulturikkut Illorsuarmi Taseralimmi takutinneqartoq. Maanna video-t atorlugit eqqumiitsuliorneq suliaraa ilaatigut Kalaallit Nunaanniit filmiliat qanganitsat 16mm-t katitikkat saqqummersitsinermi takutissavai.
Jukke Rosing (Angiuk Rosing Gausten) Nuummi Inunngortoq peroriartortorlu Københavnimut nuunneq. Københavnimut 2008-iit 2009-mut Fatamorgana-mi, Fotografisk Billedskole ilinniartunngorniarluni nuuppoq, tassani assiliissut paasititsiniaanermut aalajangiisunngortippaa. Kingorna eqqumiitsulioqatigiinnut KENBURN-mut ilannguppoq. Qanittukkut eqqumiitsuliortoq Gukki Nuka peqatigalugu Kalaallit Nunaanni eqqartuussiviit sisamat kusanarnerpaamik pinnersarnissaannut ajugaaniuttoqarmat ajugaasoq – Nuummi, Ilulissani, Qaqortumi Sisimiunilu, suliniutip 2018-mi naammassinissaa ilimagineqartoq.. 2016-mi ataatsimut saqqummersitsinermi Jette Bang i Dialog, fotografisk center-mi Københavnimi peqataavoq aamma taanna kingorna Kulturikkut Illorsuarmi Taseralimmi takutinneqartoq.
Angu Motzfeldt nipilersortartuuvoq Qaqortumi 1976-mi inunngortoq kisianni Nuummi najugaqartoq. 2016-mi ataatsimut saqqummertitsisunut “KUUK” -mut peqataavoq Iben Mondruppimit Julie Edel Hardenbergimillu aaqqissuunneqartoq. Eqqumiitsuliortup assinik saqqummersitaanik 2015-mi GrønlandsBanken asserpassuarnik saqqummersitsivoq. 2016-mi ataatsimut saqqummersitsinermi Jette Bang i Dialog, fotografisk center-mi Københavnimi peqataavoq aamma taanna kingorna Kulturikkut Illorsuarmi Taseralimmi takutinneqartoq. Angu nammineq eqqumiitsuliat assitaqarpata nipilersuutaappataluunniit immikkoortinngilai kisiannili misigisat taakkunannga pisut ataatsimut suliarisarlugit.
Nunat Avannarlerniit eqqumiitsuliortut
Lotta Törnroth Sverigimi inunngorpoq peroriartorlunilu Finlandimi 2014-mi Fine Art Alto Universitetimi Helsinkimiittumi masteritut ilinniagaqarpoq.. Eqqumiitsuliortoq ukioq taanna New Yorkimut nuuppoq fellowship awardimik Hasselblad Centerimeersumik eqquinermi kingorna, qaammatit arfinillit International Studio & Curatorial progammimi najugaqarnermik eqquinera ilaqartoq. Tassani eqqumiitsulianut tunngasoq atuagaq saqqummersippaa ’To Wait for the Inevidable – Narratives from the Sea’. Stockholmimi, Gothenburgimi, Helsinkimi, Derby-mi New York-imilu saqqummersitsinikuuvoq. Eqqumiitsuliortup imaq tunngavigalugu sulisarpoq immikkut ukkataralugu umiarsuit umiiarneri immamilu misigisinnaasat sakkortuut. Nuummi ilaatigut immap ernganik qerisumik Nuummi eqqumiitsulianik katersugaasivimmi ikkussaqarluni aammattaaq analog fotografi atorlugu suliaqarluni. Ullaaralaamit imarsuaq qanillivillugu, assit imarsuup pilerinartua aammali alianartua Törnroth-p assiliivimminit ersersippai.
Inkeri Jäntti Finlandimeersuuvoq assiliisartoq Oulu University of Applied Sciences-mit bacheloritut ilinniarsimasoq. Illut qimatat immikkut ittumik isumassarsiarisarpai, pinngortitarsuaq, arnanik illersuineq oqaluttuallu aniguinernut tunngasut aamma oqaluttuat aaqqissuussat assilisarlugit. Amerlanertigut ajoqusernernik kingunerlutsitsinernik imallit, kinaassutsimut apeqqutit aamma ilukkut eqqissineq. Nuummi Jäntti arnat arlallit kinguaasiutikkut kannguttaatsuliorfigitissimasut aallaavigisarpai oqaluttuaallu suliaralugit saqqummersippai Nipangersimaneq-mik atserlugu, isumalik nipaanneq. Assit illuni qimatani nutaanngitsuni aaqqissuussaapput avinngarusimanerusunilu innani, arnat oqaluttuaat taakkunani ersersinneqarput.
Tinne Zenner (1986, Danmarkimeersoq) analogimit filmiliat 3D-animationilu atorlugit suliai tunnganerupput, tamatumuuna timitalerlugit suliani misissorlugit, tassani oqaluttuarisaaneq, politikki ataatsimullu eqqaamasat ilaallutik. Suliai arlallit nunarsuaq tamakkerlugu film festivalinut ilaanikuupput ilaatigut Ann Arbor Film Festival, New York Film Festival, CPH:DOX, Tokyo-mi Image Forum-mi aamma Sydkoreami EXiS kiisalu Göteborgimi Konsthallimi saqqummersitsinikuuvoq, Overgaden – Institut for Samtidskunst, Charlottenborgimi Kunsthalimi aamma Københavnimi Fotografisk Centerimi. Zenner Sharna Pax-mit pilersitseqataavoq ilaasortaallunilu, filmkollektivi Londom-mi Københavnimilu aallaaveqartoq, antropologi, piviusumik tunngavillit assilialiornerlu agguataarlugit suliaqartoq. 2016-mi Det Kongelige Danske Kunstakademimi assilialiortutut ilinniarluni naammassivoq Københavnimi sulillunilu najugaqarpoq.
Marte Lill Somby (1987, Norgemeersoq) assilialiortuuvoq Samiuvoq Norskiulluni, Norgemi Tromsø-mi the Art Academy of Contemporary art bacheloriuvoq. Tamalaat, titartagartat, allapalaakkat, titartakkat, video-t, duodjit, qiperukkallu suliarisarpai. Nammineq allappoq:
”Pinngortitarsuup, kulturit kinaassutsillu isumassarsisittuarpaannga. Oqaluttuat nipaatsut tigussaasut tigussaanngitsullu akornani ilusilinnik inuttaqartinneqartut. Ulluinnarni inuunermi maluginiagassat assigiinnginnerujussui. Qimarratigisinnaanngisama angujuaannarpaannga.”
Somby-p eqqumiitsuliai samiussutsiminit tunuliaquteqarnera uteqqiattuuvoq. Somby Kalaallit Nunaanni kinaassutsip apeqqusernera aalajangersimasumullu attaveqarneq pillugit suliaqarpoq. Kristine Spore Kreutzmann kalaaleq marraliortoq peqatigalugu pop-up-mit illumi nutaangittumi qimatami Nuup qeqqani pilersitsinikuupput.