Silarsuaq takuiuk // Mikro-Makro

Nuummi Eqqumiitsulianik Saqqummersitsivimmi tallimanngornermi apriilip sisamaani nal. 15-17 saqqummersitsineq immikkoortoq nutaaq ”Silarsuaq takuiuk // Mikro-Makro” ammaanersiorneqassaaq.

Saqqummersitsiviup katersaatai qalipakkanik iikkanik ulikkaarinnissinnaasunik peqarpoq, aammalu naqitikkanik mikisuaqqanik 3×6 cm-inik peqarluni. Ukkusissanik sulianik angisoorsuarnik, ilaatigut Sassumap Arnaa aalisakkallu, aammalu nanuaqqanik tupilaaqqanillu peqarpoq. Saqqummersitsinermi nutaami ilaatigut Anne-Lise Løvstrømip (in. 1960) qalipagai angisuut, Aalut Kangermiup (1822-1869) naqitigai mikisut, Miki Lyngep (in. 1976) matusartuaraliai qalipaagaraalu, aamma Ignatius Starchip qisummik inuusaaraliai takutinneqassapput.

Saqqummersitsinermi nutaami katersani eqqumiitsuliaatigineqartut angisuut mikisuaqqallu sammineqassapput. ”Silarsuaq takuiuk // Mikro-Makro” qulequtaraa. Eqqumiitsuliat angisuut ininik immikkuullarissumik tiguaasinnaasarput, eqqumiitsuliaaraaqqallu imminerminni silarsuarmik takutitsisinnaasarlutik. Saqqummersitsinermut isertut eqqumiitsulianik tupinnarsinnaasunik aammalu eqqumiitsulianik mikisuaraaqqanik takusassinneqassapput. Eqqumiitsuliornerup siammasissusaa takuneqarsinnaassaaq, alakkaasunut angisuunut mikisunullu alutornartunik takusassaqassalluni. Saqqummersitsinerup ilaa Nuup ilisarnaataanik qaqqamit Sermitsiamit tiguarneqassaaq. Anne-Birthe Hovep nangeqattaartunik naqiteraluni Sermitsiamik suliai tassani tunngaviussapput.

Ammaanersiorneq tallimanngornermi apriilip sisamaani nal. 15-17 pissaaq. Iserneq akeqassanngilaq, piumasullu tamarmik tikilluaqusaapput. Saqqummersitsineq Kommuneqarfik Sermersuumit Aningaasaateqarfik Sermermiit taperneqarpoq, maajillu aqqarngata tungaanut takusarneqarsinnaassalluni.